СҮЛДЭЭ СҮҮДЭР ДАЙРАХААС ХАМГААЛ

Нийтийн шинж чанартай бэлгэдлүүд гэж байдаг. Нийтийн шинж чанартай бэлгэдлүүд нь нийтдээ зориулагдсан, зориулж бүтээгдсэн байх учиртай. Минийх ч биш, таных ч биш, биднийх ч биш, хэнийх ч биш ийм байлгачихаад түүнийг “хүндэтгэнэ” гэдэг бол доромжилсноос хэцүү. 

Одоо газар сайгүй есөн хөлт цагаан туг тавьдаг болчихсон. 

Нэг зүйлийг хэлэхэд “Монгол улсын ерөнхийлөгч” гэж хүн байна. Энэ бол амь бие хүн бөгөөд түмэн олны төлөөлөл. Гэхдээ монгол улсын ерөнхийлөгч маань хэн бүхэнтэй л өглөө, оройгүй уулздаггүй. Харин төрд шийдвэр гаргах, төрийг авч явах түмний төлөөллүүдтэй илүү ойр дотно харьцаа үүсгэж ажлыг явуулдаг. Энэ хүн маань бэлгэдэл, монгол улсын сүлд.  

Монгол улсын сүлд тодорхой орон зайд ажиллаж, шаардлагатай үед түмэн олондоо хандаж үгээ хэлдэг, түмэн олныхоо дунд ордог. Шаардлагагүй гэсэн үед төрийн түшээдтэй хамтран төр улсаа цааш нь удирдан залж авч явдаг. Энэ утгаар нь яривал магадгүй “ерөнхийлөгч” гэдэг хүнийг сонгочихоод, төрийн ордонд сандал тавьж суулгачихаад, хүн бүхэн орж зураг хөргөө татуулаад байвал ямар л аятайхан байх вэ дээ. Та ингэж харьцуулаад нэг бодоорой. 

Нарийн яривал сүлд нь сүлдтэйгээ л харьцах учиртай. Тэгж байж л тэр амилж шүншиглэгдэнэ. Сүлдэнд олон хүний сүүдэр дайрахаас болгоомжлох хэрэгтэй. Ийм хамгаалалт байх учиртай.